Zəfər Günü münasibətilə şəhid ailələrinə bayram hədiyyələri

2024-cü il noyabrın 4-də, Zəfər Günündən əvvəl, Quba və Qusar rayonlarında qəhrəman şəhid ailələrinin dəstəklənməsinə həsr olunmuş tədbir keçirilib.

Azərbaycan Milli Məclisinin deputatı Anatoli Rafailovun təşəbbüsü və Magen David Azerbaijan təşkilatının dəstəyi ilə bütün şəhid ailələrinə bayram hədiyyələri təqdim olunub.

Bu aksiya Azərbaycanın müstəqilliyi və ərazi bütövlüyü uğrunda canlarını fəda edən Vətən oğullarının qəhrəmanlığına göstərilən hörmət və minnətdarlığın rəmzi oldu. Şəhid ailələrinə qayğı göstərmək cəmiyyətin və dövlətin əsas vəzifələrindən biridir və bu kimi təşəbbüslər milli birliyin və həmrəyliyin möhkəmlənməsinə töhfə verir.

Xatırladaq ki, noyabrın 8-də Azərbaycanda müasir tariximizə qızıl hərflərlə yazılmış Zəfər Günü qeyd olunur. Bu tarix Azərbaycan Ordusunun qəhrəmanlığının və Prezident, Ali Baş Komandan cənab İlham Əliyevin müdrik rəhbərliyinin təcəssümüdür.

Bu gün hər birimiz şəhidlərimizin əziz xatirəsini uca tutmalı, onlar üçün dua etməli və gələcək nəsillərə onların Vətənə sədaqət və igidlik nümunəsini ötürməliyik.

Uca Tanrı bütün şəhidlərimizə rəhmət etsin və ruhlarına əbədi rahatlıq bəxş etsin!